અમદાવાદની દાદા હરિની વાવ પાસે દીવાલ ધરાશાયી થતાં બેનાં મોત, ત્રણને ઇજા...  

અમદાવાદના અસારવા વિસ્તારમાં જુની જર્જરિત દીવાલ ધરાશાયી થવાની ઘટન સામે આવી છે. આ દીવાલ ઘરાશાયી થતાં કુલ પાંચ લોકો દટાયા હતા. જેમાં 2 લોકોના ઘટનાસ્થળે જ મોત થયાં છે. જ્યારે ત્રણ લોકોને ઈજા થતાં સારવાર માટે 108 મારફતે સિવિલ હોસ્પિટલ ખસેડવામાં આવ્યા છે. ઘટનાની જાણ થતાં ફાયરબ્રિગેડની ટીમ ત્યાં પહોંચી હતી. જોકે ફાયરની ટીમ પહોંચે તે પહેલાં સ્થાનિક લોકોએ તમામ લોકોને બહાર કાઢી લીધા હતા. જેમાં બે વ્યક્તિઓ ઘટનાસ્થળે જ મૃત્યુ પામેલાં હતાં.

દીવાલ ઘરાશાયી થતાં માનસી જાટવ અને સીદ્દિક પઠાણનું મોત થયું છે. જયારે ગણપતસિંહ ગજુસિંહ વાઘેલા, મહેન્દ્ર સેંધાજી ઠાકોર, શહીદ નિઝામુદ્દીન નામના યુવાન ઈજાગ્રસ્ત થયા છે. ઘટનાની જાણ થતાં ફાયર બ્રિગ્રેડની ટીમ ઘટના સ્થળે પહોંચી હતી અને તાબડતોબ રેસ્ક્યુની કામગીરી હાથ ધરી હતી .અસારવા વિસ્તારમાં બેઠક નજીક દાદા હરિની વાવ પાછળ જે રેલવે પેરેલલ દીવાલ આવેલી છે તે ધરાશાયી થઇ હતી.

સ્થાનિકોએ જે લોકો બહાર દેખાતા હતા તેમને તાત્કાલિક ખેંચી અને બહાર કાઢી લીધા હતા. 108 એમ્બ્યુલન્સને પણ જાણ કરી દીધી હતી. કુલ પાંચ લોકોને સ્થાનિક લોકોએ બહાર કાઢ્યા હતા. જેમાં બે વ્યક્તિઓ ઘટનાસ્થળે જ મૃત્યુ પામેલા હતા. જ્યારે ત્રણ લોકો જીવિત હાલતમાં હોવાથી તેમને સારવાર અર્થે હોસ્પિટલ ખસેડવામાં આવ્યા છે. રેલવેની દીવાલ પાસે આ લોકો શા માટે ​​​​​​ બેઠા હતા ને ત્યાં રહેતા હતા કે કેમ તે અંગે તપાસ શરૂ કરવામાં આવી છે.