રાજકોટથી ભાજપના ઉમેદવાર પરસોત્તમ રૂપાલા આ તારીખે ભરશે ઉમેદવારી પત્ર

ક્ષત્રિયો સાથેના વિવાદ વચ્ચે મહત્વના સમાચાર સામે આવ્યા છે. પરસોત્તમ રૂપાલાના ઉમેદવારી ફોર્મ ભરવાની તારીખની જાહેરાત કરવામાં આવી છે. રાજકોટથી ભાજપના ઉમેદવાર પરસોત્તમ રૂપાલા 16 એપ્રિલના રોજ લોકસભા ચૂંટણી માટે ઉમેદવારી પત્ર ભરશે. ઉમેદવારી પત્ર ભરતા અગાઉ રૂપાલા રાજકોટના રેસકોર્સ બહુમાળી ચોકમાં જંગી સભાને સંબોધશે. આ સભાના આયોજનને લઇને ભાજપ દ્રારા તડામાર તૈયારીઓ શરૂ કરી દેવામાં આવી છે.

એક બાજુ રાજ્યભરમાં ક્ષત્રિય સમાજ દ્વારા પરસોત્તમ રૂપાલાનો વિરોધ થઇ રહ્યો છે તો બીજી તરફ રાજકોટ શહેર ભાજપ દ્વારા તેમની સભાની તૈયારીઓ શરૂ કરવામાં આવી છે. રાજકોટના રેસકોર્સ બહુમાળી ચોક આગામી 16 તારીખે ભાજપે સભાનું આયોજન કર્યું હતું. રૂપાલા 16 તારીખના રોજ ફોર્મ ભરશે. ફોર્મ ભરતા પહેલા રાજકોટના રેસકોર્સ બહુમાળી ભવન પાસે જંગી સભાને સંબોધશે. રૂપાલાની સભા પર સમગ્ર રાજ્યની નજર રહેશે.

આ સભામાં રાજકોટ લોકસભા મતવિસ્તારના ભાજપના અગ્રણીઓ ઉપસ્થિત રહેશે. સાંસદ,ધારાસભ્યો,સંગઠનના હોદ્દેદારો પણ સભામાં હાજરી આપશે. રાજકોટ શહેર ભાજપના કોર્પોરેટરો પણ સભામાં ઉપસ્થિત રહેશે. સભાને લઈને કડક પોલીસ બંદોબસ્ત ગોઠવવામાં આવશે.