આજથી હાડ થીજવતી ઠંડીની શરૂઆત, ઉત્તરથી લઈ દક્ષિણ સુધીના રાજ્યોમાં પારો ગગડ્યો... 

દેશભરમાં ઠંડીનો પ્રકોપ વધી રહ્યો છે, તાપમાનમાં ઘટાડો થઈ રહ્યો છે. દિલ્હીમાં પ્રદૂષણની સાથે ઠંડીએ લોકોને પરેશાન કર્યા છે. ધુમ્મસની સાથે ઠંડીની અસર પંજાબ, હરિયાણા, ઉત્તર પ્રદેશ અને રાજસ્થાનમાં પણ જોવા મળી રહી છે. દેશમાં ઠંડીએ જોર પકડ્યું છે. લોકોને હવે હળવી ઠંડીનો અહેસાસ થવા લાગ્યો છે. સવાર-સાંજ ફૂંકાતા ઠંડા પવનો અને તાપમાનનો પારો ગગડતાં લોકોએ રજાઈ ધાબળા અને જેકેટો બહાર કાઢી લીધા છે. ઉત્તરથી દક્ષિણ તરફ દરરોજ તાપમાનનો પારો ગગડી રહ્યો છે. જો કે, દિલ્હી-યુપીમાં ઠંડીની સાથે પ્રદૂષણે સ્થિતિ વધુ ખરાબ કરી છે. રાજધાની દિલ્હીમાં પ્રદૂષણના કારણે લોકોની પરેશાની વધી ગઈ છે. પહાડી રાજ્યોમાં પણ લઘુત્તમ તાપમાનનો પારો ગગડ્યા બાદ હિમવર્ષા શરૂ થઈ ગઈ છે.દિલ્હીમાં સવાર અને સાંજના સમયે લોકોને ઠંડીનો અનુભવ થવા લાગ્યો છે. આજના હવામાનની વાત કરીએ તો મહત્તમ તાપમાન 26 ડિગ્રી અને લઘુત્તમ તાપમાન 11 ડિગ્રી સુધી નોંધાઈ શકે છે. હવામાન વિભાગના જણાવ્યા અનુસાર, રાજધાનીમાં સવારે અને સાંજના સમયે ધુમ્મસ છવાયેલું રહેશે. હવામાન વિભાગ અનુસાર, 22 નવેમ્બરથી 26 નવેમ્બરની વચ્ચે રાજધાનીનું મહત્તમ તાપમાન 26 અને લઘુત્તમ તાપમાન 14 ડિગ્રી રહી શકે છે. ગઈ રાત દિલ્હીમાં આ સિઝનની અત્યાર સુધીની સૌથી ઠંડી રાત નોંધાઈ હતી અને બુધવારે રાત્રે તાપમાન ઘટીને 11.2 ડિગ્રી સેલ્સિયસ થઈ ગયું હતું.