છત્તીસગઢના દુર્ગમાં ભીષણ દુર્ઘટના, બસ ખીણમાં ખાબકતા 12ના મોત....

છત્તીસગઢથી એક મોટા સમાચાર સામે આવી રહ્યા છે. છત્તીસગઢના દુર્ગ જિલ્લામાં ગઈકાલે રાત્રે કર્મચારીઓથી ભરેલી બસ 50 ફૂટ ઊંડા ખાણના ખાડામાં પડતાં 12 લોકોના કરૂણ મોત થયા છે. જ્યારે અનેક લોકો ઘાયલ થયા છે. અકસ્માત બાદ સમગ્ર રાજ્યમાં ભયનો માહોલ છે. આ કર્મચારીઓ કેડિયા ડિસ્ટિલરી કંપનીમાં કામ કરતા હતા. દુર્ઘટના બાદ કંપનીએ મૃતકોના પરિવારજનોને 10-10 લાખ રૂપિયા, એક સભ્યને નોકરી અને ઘાયલોનો સંપૂર્ણ ખર્ચ ઉઠાવવાનું વચન આપ્યું છે. પીએમ મોદી અને રાજ્ય પ્રમુખ વિષ્ણુ દેવ સાંઈએ પણ આ ઘટના પર શોક વ્યક્ત કર્યો છે.

પ્રાપ્ત માહિતી અનુસાર, આ દુર્ઘટના કુમ્હારીના ખાપરી રોડ પર મુરુમ ખાણ પાસે થઈ હતી. તમને જણાવી દઈએ કે કેડિયા ડિસ્ટિલરી કંપનીના કર્મચારીઓ પ્લાન્ટમાંથી કામ કરીને બસ દ્વારા ઘરે પરત ફરી રહ્યા હતા. આ દરમિયાન બસ બેકાબુ થઈ ગઈ અને 50 ફૂટ  ઊંડા ખાણના ખાડામાં પડી હતી. આ અકસ્માત થયો ત્યારે બસમાં 40 કર્મચારીઓ હતા. દુર્ઘટના બાદ સીએમ વિષ્ણુ દેવે કહ્યું કે દોષિતો સામે કાર્યવાહી કરવામાં આવશે. આ અંગે મેજિસ્ટ્રેટ તપાસના આદેશ પણ આપવામાં આવ્યા છે.

• પીએમએ દુઃખ વ્યક્ત કર્યું

અકસ્માત બાદ પીએમ નરેન્દ્ર મોદીએ શોક વ્યક્ત કર્યો, તેમણે ટ્વીટ કરીને લખ્યું કે છત્તીસગઢના દુર્ગમાં જે બસ દુર્ઘટના થઈ તે ખૂબ જ દુઃખદ છે. આમાં, જેમણે તેમના પ્રિયજનોને ગુમાવ્યા છે તેમના પ્રત્યે મારી સંવેદના, આ સાથે હું ઘાયલોના ઝડપથી સ્વસ્થ થવાની કામના કરું છું. રાજ્ય સરકારની દેખરેખ હેઠળ, સ્થાનિક વહીવટીતંત્ર પીડિતોને શક્ય તમામ મદદ પૂરી પાડવામાં વ્યસ્ત છે.

• મુખ્યમંત્રીએ દુઃખ વ્યક્ત કર્યું

પીએમ મોદી ઉપરાંત રાજ્યના સીએમ વિષ્ણુ દેવ સાઈએ પણ આ અંગે દુઃખ વ્યક્ત કર્યું છે. ટ્વીટ કરતા તેમણે લખ્યું કે દુર્ગના કુમ્હારી પાસે એક ખાનગી કંપનીના કર્મચારીઓથી ભરેલી બસના અકસ્માત અંગે દુઃખદ માહિતી મળી છે.આ અકસ્માતમાં 11 કર્મચારીઓના મોતના સમાચાર મળી રહ્યા છે. હું મૃતકના આત્માને શાંતિ અને શોકગ્રસ્ત પરિવારોને શક્તિ આપે તેવી ભગવાનને પ્રાર્થના કરું છું.અકસ્માતમાં ઘાયલ થયેલા કર્મચારીઓની સારવાર માટે પૂરતી વ્યવસ્થા કરવામાં આવી છે.તેમના ઝડપથી સાજા થાય તેવી પ્રાર્થના કરું છું.