એલ્વિશ યાદવે  સાપના ઝેર મંગાવાની કરી કબુલાત: કહ્યું- પાર્ટીઓમાં આરોપીઓને મળતો...  

YouTuber અને Bigg Boss OTT 2ના વિજેતા એલ્વિશ યાદવની મુશ્કેલીઓ વધી રહી છે. નોઈડા પોલીસ સૂત્રોના જણાવ્યા અનુસાર, એલ્વિશ યાદવે સ્વીકાર્યું છે કે તે પાર્ટી માટે સાપ અને સાપના ઝેરનો ઓર્ડર આપતો હતો. આ ઉપરાંત તેણે એ પણ કબૂલ્યું છે કે તે પોલીસ કસ્ટડીમાં રહેલા અન્ય આરોપીઓને પહેલાથી ઓળખતો હતો.

રવિવારે નોઈડા પોલીસે એલ્વિશ યાદવને પૂછપરછ માટે બોલાવ્યો હતો. આ પછી, પોલીસે એલ્વિશની ધરપકડ કરી અને તેને કોર્ટમાં રજૂ કર્યો, જ્યાંથી કોર્ટે તેને 14 દિવસ માટે ન્યાયિક કસ્ટડીમાં મોકલી દીધો. હવે પોલીસ સૂત્રોએ જણાવ્યું છે કે પૂછપરછ દરમિયાન એલ્વિશ યાદવે કબૂલાત કરી છે કે તે રાહુલ સહિત તમામ ધરપકડ કરાયેલા આરોપીઓને અલગ-અલગ રેવ પાર્ટીઓમાં મળ્યો હતો. આ ઉપરાંત તેણે આરોપીના સંપર્કમાં હોવાનું પણ કબૂલ્યું છે.

નોઈડા પોલીસે એલ્વિશ યાદવ પર NDPS એક્ટની કલમ 29 લગાવી છે. NDPS એક્ટની આ કલમ ત્યારે લાગુ કરવામાં આવે છે જ્યારે કોઈ વ્યક્તિ ડ્રગ સંબંધિત ષડયંત્રમાં સામેલ હોય. આ કાયદા હેઠળ આરોપીને સરળતાથી જામીન મળતા નથી. આવી સ્થિતિમાં એલ્વિશ માટે મુશ્કેલીઓ વધતી જોવા મળી રહી છે.

ગયા વર્ષે નવેમ્બરમાં પોલીસે નોઈડામાંથી પાંચ લોકોની ધરપકડ કરી હતી. આ પાંચ લોકો હતા રાહુલ, તિતુનાથ, જય કરણ, નારાયણ અને રવિનાથ. પોલીસને તેમની પાસેથી અનેક પ્રકારના સાપ અને સાપનું ઝેર મળી આવ્યું હતું. તપાસ દરમિયાન જાણવા મળ્યું કે રેવ પાર્ટીઓમાં સાપના ઝેરનો ઉપયોગ કરવામાં આવે છે. આરોપીઓએ પૂછપરછ દરમિયાન એવો પણ ખુલાસો કર્યો હતો કે એલ્વિશ યાદવની પાર્ટીઓમાં ઝેરમાંથી બનેલી દવાઓનો પણ ઉપયોગ થતો હતો.

આ પછી પોલીસે એલ્વિશ યાદવ સહિત આ તમામ આરોપીઓ વિરુદ્ધ કેસ નોંધ્યો હતો. એલ્વિશની અગાઉ પણ ઘણી વખત પૂછપરછ કરવામાં આવી હતી, પરંતુ ગઈકાલે પોલીસે પૂછપરછ બાદ તેની ધરપકડ કરી હતી. આ કેસમાં અગાઉ ધરપકડ કરાયેલા પાંચ આરોપીઓ હાલ જામીન પર બહાર છે.