સ્મૃતિ ઈરાની VS રાહુલ ગાંધી: લોકસભા ચુંટણી પહેલા ફરી એક વખત અમેઠીની મુલાકાતે... 

લોકસભા ચૂંટણી પહેલા અમેઠીમાં ફરી એકવાર લોકો વચ્ચે ચર્ચાનું વિષય બન્યું છે. એક તરફ અમેઠીના પૂર્વ સાંસદ રાહુલ ગાંધી ભારત જોડો ન્યાય યાત્રા સાથે લાંબા સમય બાદ અમેઠી આવી રહ્યા છે, તો બીજી તરફ કેન્દ્રીય મંત્રી અને સાંસદ સ્મૃતિ ઈરાની  પણ આજથી ચાર દિવસની મુલાકાતે તેમના સંસદીય ક્ષેત્ર અમેઠીની મુલાકાતે આવશે.

કેન્દ્રીય મંત્રી સ્મૃતિ ઈરાની જન સંવાદ વિકાસ યાત્રામાં ભાગ લઈને તેમના નવા નિવાસસ્થાનમાં પ્રવેશ કરશે, જ્યારે રાહુલ ગાંધી અમેઠી અને ગૌરીગંજ શહેરમાં પદયાત્રા કરશે અને બાબુગંજમાં જાહેર સભાને સંબોધશે. એવામાં ચૂંટણી પહેલા અમેઠીમાં બંને મોટા નેતાઓના એકસાથે આગમન બાદ રાજકારણ ગરમાયું છે.

અમેઠીની રાજકીય લડાઈ ઘણી રીતે ખાસ માનવામાં આવે છે. આ બેઠક ગાંધી પરિવારની પારિવારિક બેઠક હોવાનું કહેવાય છે. સંજય ગાંધી, રાજીવ ગાંધી, સોનિયા ગાંધી અને રાહુલ ગાંધી અહીંથી સાંસદ બન્યા. 2004થી 2019 સુધી અહીંથી ચૂંટાઈને રાહુલ દિલ્હી પહોંચતા રહ્યા, પરંતુ 2019ની લોકસભા ચૂંટણીમાં આ ટ્રેન્ડ બદલાઈ ગયો. કોંગ્રેસનો ગઢ ગણાતી આ બેઠક પરથી ભાજપના સ્મૃતિ ઈરાની  સાંસદ બન્યા હતા અને ત્યારથી બંને પક્ષના કાર્યકરો વચ્ચે ઘર્ષણ ચાલી રહ્યું છે

એક તરફ રાહુલ ગાંધીની ભારત જોડો ન્યાય યાત્રા સોમવારે સંસદીય ક્ષેત્ર અમેઠીની દેવરી બોર્ડરથી પ્રવેશ કરશે. કોંગ્રેસના રાષ્ટ્રીય અધ્યક્ષ મલ્લિકાર્જુન ખડગે પણ આમાં ભાગ લઈ રહ્યા છે. સાંજે 4 વાગ્યે આંધી ગામ પાસેના ટોલ પ્લાઝા પર જાહેર સભાનો કાર્યક્રમ યોજાશે. આ માટે રવિવારે આખો દિવસ કોંગ્રેસના કાર્યકરો તૈયારીઓમાં વ્યસ્ત રહ્યા હતા.

બીજી તરફ કેન્દ્રીય મંત્રી અને સ્થાનિક સાંસદ સ્મૃતિ ઈરાનીની જનસંવાદ વિકાસ યાત્રા ફરી એકવાર સોમવારથી શરૂ થઈ રહી છે. જેમાં સ્થાનિક લોકો સાથે વાતચીત કરીને તેમની સમસ્યાઓનું ઝડપથી નિરાકરણ કરવામાં આવશે. સરકારી યોજનાઓ વિશે પણ માહિતી આપવામાં આવશે

આ તરફ સોનિયા ગાંધી રાયબરેલી છોડી રહ્યા છે તો બીજી તરફ અમેઠીની સાંસદ સ્મૃતિ ઈરાની  અમેઠી સાથેના પોતાના પારિવારિક સંબંધોને મજબૂત કરતી જોવા મળી રહી છે. સાંસદ સ્મૃતિ ઈરાનીએ ગૌરીગંજના મેદન મવાઈ ગામમાં 11 વિઘા જમીન ખરીદીને પોતાનું ઘર બનાવ્યું છે. 22 ફેબ્રુઆરીએ સાંસદ સ્મૃતિ ઈરાની  તેમના ઘરમાં પ્રવેશ કરશે. સાંસદ હવે અમેઠીમાં રહીને લોકોની સમસ્યાઓ સાંભળતા જોવા મળશે.