બેંગલુરુમાં વધુ એક બ્લાસ્ટ થશે', કર્ણાટક સરકારને મળ્યો ધમકીભર્યો ઈ-મેલ...

બેંગલુરુમાં બ્રુકફિલ્ડ વિસ્તારમાં રામેશ્વરમ કાફેમાં તાજેતરમાં થયેલા બ્લાસ્ટ બાદ કર્ણાટક સરકારને બોમ્બની ધમકી ધરાવતો ઈમેલ મળ્યો છે. ઈમેલમાં ધમકી આપવામાં આવી હતી કે બેંગલુરુમાં શનિવારે (9 માર્ચ) બપોરે 2:48 વાગ્યે બીજો બ્લાસ્ટ થશે. શાહિદ ખાન નામના વ્યક્તિ દ્વારા મોકલવામાં આવેલા ઈમેલથી પોલીસ વિભાગમાં હલચલ મચી ગઈ હતી. સાયબર ક્રાઈમ પોલીસે આ કેસની તપાસ શરૂ કરી છે. ધમકીભર્યા ઈમેલમાં જણાવવામાં આવ્યું છે કે બસ, ટ્રેન, મંદિરો અને રેસ્ટોરન્ટ જેવા જાહેર સ્થળોએ બોમ્બ મુકવામાં આવ્યા છે. એવું પણ લખવામાં આવ્યું છે કે બ્લાસ્ટ અંબારી ઉત્સવ (કાર્નિવલ) જેવા જાહેર કાર્યક્રમ દરમિયાન પણ થઈ શકે છે. ઈમેલ મળ્યા બાદ પોલીસ એક્શનમાં આવી ગઈ હતી. સાવચેતીને લઈને પોલીસે કર્ણાટકમાં સુરક્ષા વ્યવસ્થા સઘન બનાવી છે. વાહનોની તપાસ કરવામાં આવી રહી છે. પોલીસ દરેક ખૂણા પર નજર રાખી રહી છે. ઈમેલમાં આરોપીએ શહેરમાં બોમ્બ બ્લાસ્ટની ઘટનાને રોકવા માટે 2.5 મિલિયન ડોલરની ખંડણી માંગી છે.

બેંગલુરુના હાઈપ્રોફાઈલ બ્રુકફીલ્ડ વિસ્તારમાં સ્થિત રામેશ્વરમ કાફેમાં 1 માર્ચે બ્લાસ્ટ થયો હતો.અહીં મોટી સંખ્યામાં લોકો આવે છે. કદાચ આ જ કારણ છે કે આ જગ્યાને બ્લાસ્ટ માટે પસંદ કરવામાં આવી હતી. આ બ્લાસ્ટમાં 10 લોકો ઘાયલ થયા છે. વિસ્ફોટ થતાની સાથે જ અંદર ધુમાડો ભરાઈ ગયો અને લોકો જીવ બચાવવા માટે આમ તેમ દોડતા જોવા મળ્યા. શરૂઆતમાં લોકોને લાગ્યું કે કદાચ સિલિન્ડર બ્લાસ્ટ છે, પરંતુ જ્યારે પોલીસ અને NIAની ટીમ ઘટનાસ્થળે પહોંચી તો શંકાની સોય બીજી દિશામાં ફરી ગઈ. આ પછી મામલો સંપૂર્ણ રીતે NIAને સોંપવામાં આવ્યો હતો.

ગુપ્તચર એજન્સીઓને શંકા છે કે આ બ્લાસ્ટ કેસમાં જુનૈદ અને સલમાન નામના બે આતંકવાદીઓ સામેલ છે. બંને હાલ અઝરબૈજાનમાં હાજર છે. બંનેનું લોકેશન પહેલા દુબઈમાં મળી આવ્યું હતું, પરંતુ બાદમાં તેઓ ત્યાંથી ફરાર થઈ ગયા હતા. બંને લશ્કર મોડ્યુલના સભ્યો હોવાનું કહેવાય છે. લશ્કર મોડ્યુલના ભયને ધ્યાનમાં રાખીને NIAની ટીમે મંગળવારે વહેલી સવારે સાત રાજ્યોમાં એક સાથે દરોડા પાડ્યા હતા. કેન્દ્રીય તપાસ એજન્સી કર્ણાટક, કેરળ અને તમિલનાડુ સહિત સાત રાજ્યોમાં 17 સ્થળો પર સર્ચ કરી રહી છે. NIAની અત્યાર સુધીની તપાસમાં સામે આવ્યું છે કે બેંગલુરુ સેન્ટ્રલ જેલમાં બંધ લશ્કર-એ-તૈયબાના આતંકવાદી ટી-નઝીર કેદીઓને હિંસક પ્રવૃત્તિઓ કરવા માટે કટ્ટરપંથી બનાવી રહ્યો હતો.