'જો પગલાં નહીં લો તો 2027માં યુપીમાં હારીશું..' ભાજપના MLAએ મોદી સરકારને આપી ચેતવણી...

ભાજપના જ ધારાસભ્ય રમેશચંદ્ર મિશ્રાનો એક વીડિયો સોશિયલ મીડિયા પર વાયરલ થઈ રહ્યો છે. જેમાં ધારાસભ્ય પોતાની જ યોગી સરકાર પર સવાલ ઉઠાવતા જોવા મળી રહ્યા છે.

• ધારાસભ્યએ મોદી સરકારને ચેતવી

ધારાસભ્ય મિશ્રાનું કહેવું છે કે જો સ્થિતિ આવી જ રહી તો 2027માં યુપીમાં ભારતીય જનતા પાર્ટી(BJP) ની સરકાર  નહીં બની શકે. આ પાછળ તેમણે તર્ક પણ આપ્યો છે. તેમનું કહેવું છે કે જ્યાં સુધી કેન્દ્ર આ મામલે હસ્તક્ષેપ નહીં કરે ત્યાં સુધી સરકાર નહીં બને. છેલ્લી લોકસભા ચૂંટણીમાં ભાજપનું પ્રદર્શન ખરાબ રહ્યું હતું. આ જ કારણ છે કે જૌનપુરની બદલાપુર વિધાનસભા બેઠક પરથી ઉમેદવારને હારનો સામનો કરવો પડ્યો હતો.

• અધિકારીઓ અહંકારી બન્યા 

મિશ્રાએ એમ પણ કહ્યું કે અધિકારીઓ અહંકારી બની ગયા છે અને જનતાની ફરિયાદો સાંભળતા નથી. એટલું જ નહીં, તેઓ જનપ્રતિનિધિઓને પણ માન આપતા નથી અને મનમાની કરી રહ્યા છે, જેના કારણે સામાન્ય લોકોમાં સરકાર સામે રોષ જોવા મળી રહ્યો છે. ઉત્તર પ્રદેશમાં કેન્દ્રીય નેતૃત્વએ હસ્તક્ષેપ કરીને મોટો નિર્ણય લેવો પડશે. તો જ કંઈક થશે અને ઉત્તર પ્રદેશમાં ફરી સરકાર બનશે. અન્યથા વર્તમાન માહોલ પરથી લાગે છે કે 2027માં પણ સરકાર નહીં બને.

• સપાએ પીડીએનો ભ્રમ ફેલાવ્યો

ભાજપના ધારાસભ્યએ મોદી સરકારને ચેતવતા કહ્યું કે લોકસભા ચૂંટણી દરમિયાન પીડીએને લઈને સમાજવાદી પાર્ટી દ્વારા ફેલાવાયેલો ભ્રમ દૂર કરવો પડશે. મુખ્યમંત્રીએ મંત્રીઓ સાથે બેઠક કરીને આ સમસ્યાનો ઉકેલ શોધવો જોઈએ.

• પૂર્વ કેબિનેટ મંત્રીએ પણ સવાલો ઉઠાવ્યા હતા

અગાઉ શુક્રવારે ભાજપ નેતા અને પૂર્વ કેબિનેટ મંત્રી મોતી સિંહે પણ આવું જ નિવેદન આપ્યું હતું. મોતી સિંહે એમ પણ કહ્યું હતું કે મેં મારી 42 વર્ષની રાજકીય કારકિર્દીમાં ક્યારેય આટલા ભ્રષ્ટાચારની કલ્પના કરી ન હતી. આજે સૌથી વધુ ભ્રષ્ટાચાર યુપીના પોલીસ સ્ટેશનો અને તાલુકાઓમાં થઈ રહ્યો છે.