પૂર્વ ભારતીય ફાસ્ટ બોલર ડેવિડ જોન્સનનું નિધન...  

એક તરફ જ્યાં ભારતીય ટીમ T20 વર્લ્ડ કપ 2024ના સુપર-8માં આજે અફઘાનિસ્તાન સામે જંગની તૈયારી કરી રહી છે, ત્યારે બીજી તરફ ક્રિકેટ વર્લ્ડ કપને લઈને ચોંકાવનારા સમાચાર સામે આવ્યા છે. પૂર્વ ભારતીય ફાસ્ટ બોલર ડેવિડ જોન્સનનું નિધન થયું છે. અહેવાલોમાં દાવો કરવામાં આવી રહ્યો છે કે તેણે તેના એપાર્ટમેન્ટના ચોથા માળેથી છલાંગ લગાવી હતી. તેમના નિધનના સમાચારથી ભારતીય ક્રિકેટરોમાં શોકનો માહોલ છે. પૂર્વ કેપ્ટન અનિલ કુંબલેએ આશ્ચર્ય વ્યક્ત કર્યું છે.પોલીસના જણાવ્યા અનુસાર પૂર્વ ભારતીય ક્રિકેટર ડેવિડ જોનસન (ગુરુવારે) આજે  તેના એપાર્ટમેન્ટની બહાર મૃત હાલતમાં મળી આવ્યો હતો. એક પોલીસ અધિકારીએ જણાવ્યું હતું કે ડેવિડ જુડ જ્હોન્સન, 52, કનાકા શ્રી લેઆઉટ, કોથનૂર ખાતેના તેના એપાર્ટમેન્ટમાંથી પડી ગયો હોવાનું માનવામાં આવે છે, જેણે આત્મહત્યાની શંકા વ્યક્ત કરી હતી. વધુ તપાસ ચાલુ હોવાનું તેમણે જણાવ્યું હતું.

પોલીસ સૂત્રોએ જણાવ્યું કે ક્રિકેટર છેલ્લા કેટલાક સમયથી બીમાર હતો. તેણે કહ્યું કે પૂર્વ ઝડપી બોલર જોન્સનના પરિવારમાં તેની પત્ની, એક પુત્ર અને એક પુત્રી છે. આ ક્રિકેટરે 1996માં ભારત માટે બે ટેસ્ટ મેચ રમી હતી. તમને જણાવી દઈએ કે તે કર્ણાટક ટીમનો ભાગ હતો જેમાં અનિલ કુંબલે, વેંતકેશ પ્રસાદ, ડોડા ગણેશ અને જવાગલ શ્રીનાથ રમ્યા હતા. તેણે કુલ 39 ફર્સ્ટ ક્લાસ મેચ રમી હતી. તે પોતાના ઘરની નજીક ક્રિકેટ એકેડમી ચલાવતો હતો.પૂર્વ ભારતીય કેપ્ટન અનિલ કુંબલેએ ઈન્સ્ટાગ્રામ પર લખ્યું - મારા ક્રિકેટ પાર્ટનર ડેવિડ જોન્સનના નિધનના સમાચાર સાંભળીને દુઃખ થયું. તેમના પરિવાર પ્રત્યે હૃદયપૂર્વક સંવેદના. બહુ જલ્દી ગયો બેની! ઉલ્લેખનીય છે કે તે કર્ણાટક માટે ડોમેસ્ટિક ક્રિકેટ રમ્યો હતો. તેણે 1995-96ની રણજી ટ્રોફી સિઝનમાં કેરળ સામે 152 રન આપીને 10નું શ્રેષ્ઠ પ્રદર્શન કર્યું, જેના કારણે તેને રાષ્ટ્રીય ઓળખ મળી. આ પછી તેણે ઓસ્ટ્રેલિયા સામે 1996માં ફિરોઝ શાહ કોટલામાં એકમાત્ર ટેસ્ટ મેચમાં ડેબ્યૂ કર્યું હતું. ફર્સ્ટ ક્લાસ ક્રિકેટમાં તેણે 39 મેચમાં 28.63ની એવરેજ અને 47.4ની સ્ટ્રાઈક રેટથી 125 વિકેટ લીધી હતી. તે નીચલા ક્રમનો બેટ્સમેન હતો જેણે ફર્સ્ટ ક્લાસ ક્રિકેટમાં તેના નામે એક સદી પણ નોંધાવી હતી.

• 157.8 કિમી પ્રતિ કલાકની ઝડપે બોલ ફેંકીને ચોંકાવી દીધા

16 ઓક્ટોબર 1971ના રોજ જન્મેલા ડેવિડ જ્હોન્સને 1990ના દાયકાના મધ્યમાં આંતરરાષ્ટ્રીય ક્રિકેટમાં ભારતનું પ્રતિનિધિત્વ કર્યું હતું. જ્હોન્સને ઑક્ટોબર 1996માં ઑસ્ટ્રેલિયા સામે ભારત તરફથી ટેસ્ટ ડેબ્યૂ કર્યું હતું. ઓસ્ટ્રેલિયા સામેની ટેસ્ટ મેચ દરમિયાન જ્હોન્સનની કારકિર્દીની સૌથી ગૌરવપૂર્ણ ક્ષણ 157.8 કિમી પ્રતિ કલાકની ઝડપે બોલિંગ હતી. તેની છેલ્લી ટેસ્ટ મેચ 1996માં ડરબનમાં દક્ષિણ આફ્રિકા સામે હતી. તેણે ભારત માટે વનડે મેચ રમી ન હતી.

ભારતીય ક્રિકેટ કંટ્રોલ બોર્ડના સચિવ જય શાહે ટ્વિટર પર લખ્યું - અમારા ભૂતપૂર્વ ભારતીય ફાસ્ટ બોલર ડેવિડ જોન્સનના પરિવાર અને મિત્રો પ્રત્યે ઊંડી સંવેદના. રમતમાં તેમનું યોગદાન હંમેશા યાદ રહેશે. 33 લિસ્ટ A મેચમાં તેણે 41 વિકેટ લીધી હતી. તેની સ્પર્ધાત્મક ક્રિકેટની છેલ્લી મેચ 2015માં કર્ણાટક પ્રીમિયર લીગમાં હતી. ગૌતમ ગંભીરે લખ્યું, 'ડેવિડ જોન્સનના નિધનથી દુઃખી છું. ભગવાન તેમના પરિવાર અને પ્રિયજનોને શક્તિ આપે.