કેનેડા: નિજ્જર હત્યા કેસમાં પોલીસે ત્રણ ભારતીય નાગરિકોની ધરપકડ કરી છે...  

કેનેડિયન પોલીસે ખાલિસ્તાની અલગતાવાદી હરદીપ સિંહ નિજ્જરની હત્યા કેસમાં ધરપકડ કરાયેલા ત્રણ આરોપીઓની તસવીરો જાહેર કરી છે. રોયલ કેનેડિયન માઉન્ટેડ પોલીસે આ ત્રણ આરોપીઓની ઓળખ કમલપ્રીત સિંહ, કરણપ્રીત સિંહ અને કરણ બ્રાર તરીકે કરી છે

ગયા વર્ષે સપ્ટેમ્બરમાં કેનેડાના વડા પ્રધાન જસ્ટિન ટ્રુડોએ ભારતીય એજન્ટો પર નિજ્જરની હત્યામાં "સંભવિત રીતે" સામેલ હોવાનો આરોપ મૂક્યો હતો, જે પછી ભારત અને કેનેડા વચ્ચેના સંબંધો વણસ્યા હતા. ભારતે ટ્રુડોના આરોપોને "વાહિયાત" અને "પ્રેરિત" ગણાવીને ફગાવી દીધા હતા.

સૂત્રોના જણાવ્યા અનુસાર, ત્રણ લોકોની ધરપકડ કરવામાં આવી છે અને તેમના પર આરોપ છે કે જે દિવસે નિજ્જરની બ્રિટિશ કોલંબિયાના સરેમાં ગુરુદ્વારાની બહાર હત્યા કરવામાં આવી હતી તે દિવસે શૂટર, ડ્રાઇવર વગેરે તરીકે કામ કર્યું હતું. સીટીવી ન્યૂઝે એક વરિષ્ઠ સરકારી સ્ત્રોતને ટાંકીને જણાવ્યું હતું કે ત્રણ લોકોની ધરપકડ કરવામાં આવી છે અને નિજ્જરની હત્યાનો આરોપ મૂકવામાં આવ્યો છે. કોર્ટના દસ્તાવેજોથી જાણવા મળ્યું છે કે કરણપ્રીત સિંહ, કમલપ્રીત સિંહ અને કરણ બ્રાર પર નિજ્જરની હત્યા અને હત્યાના કાવતરાનો આરોપ છે