ટેસ્લાએ પોતાની કાર માટે ટાટા ઈલેક્ટ્રોનિક્સ પાસેથી સેમિકન્ડક્ટર ચિપ્સ ખરીદવા માટે મોટો સોદો કર્યો હોવાની ચર્ચા...

અમેરિકન કંપની ટેસ્લાએ તેની કારમાં સેમિકન્ડક્ટર લગાવવા માટે ટાટા ઈલેક્ટ્રોનિક્સ સાથે ડીલ કરી હોવાની ચર્ચા છે. આ સોદો એટલા માટે પણ મહત્વપૂર્ણ છે કારણ કે તે ટાટા ઈલેક્ટ્રોનિક્સને ટોચના વૈશ્વિક ક્લાયન્ટ્સ માટે વિશ્વસનીય સપ્લાયર તરીકે સ્થાપિત કરશે. આ ડીલ થોડા મહિનામાં પૂર્ણ થશે. એક અહેવાલ મુજબ Tata Electronics અને Tesla વચ્ચેની ડીલની રકમનો ખુલાસો કરવામાં આવ્યો નથી. કંપનીઓએ પણ આ ડીલ પર કંઈ કહ્યું નથી. તાજેતરમાં સોશિયલ મીડિયા પ્લેટફોર્મ X પર એલન મસ્કે માહિતી આપી હતી કે તેઓ ભારતના વડા પ્રધાન નરેન્દ્ર મોદીને મળી શકે છે. એક રિપોર્ટમાં દાવો કરવામાં આવ્યો છે કે એલન મસ્ક 22 એપ્રિલથી શરૂ થતા સપ્તાહ દરમિયાન ભારત આવી શકે છે. PM મોદીને મળ્યા બાદ એલન મસ્ક ટેસ્લાની ભારત આવવાની શક્યતાઓની પુષ્ટિ કરી શકે છે અને મોટા રોકાણની જાહેરાત કરી શકે છે. 

• આવતા અઠવાડિયે મસ્કની બહુપ્રતિક્ષિત મુલાકાત

ટાટા અને ટેસ્લા વચ્ચેની આ ડીલના સમાચાર એવા સમયે આવ્યા છે જ્યારે એલન મસ્ક આવતા અઠવાડિયે ભારત આવવાના છે. ઈલોન મસ્ક 21-22 એપ્રિલે ભારતની મુલાકાત દરમિયાન વડાપ્રધાન નરેન્દ્ર મોદીને પણ મળશે. એવી અટકળો છે કે તેમની મુલાકાત દરમિયાન એલોન મસ્ક ભારતમાં ટેસ્લા મેન્યુફેક્ચરિંગ શરૂ કરવાની જાહેરાત કરી શકે છે. એવું કહેવામાં આવી રહ્યું છે કે મસ્ક EV પ્લાન્ટ સહિત વિવિધ બિઝનેસમાં 2 થી 3 બિલિયન ડૉલરનું રોકાણ કરવાની યોજના આગળ ધપાવી શકે છે.

• ટાટાને આ બુસ્ટ ટેસ્લા તરફથી મળશે

જો સેમિકન્ડક્ટર્સ માટે ટાટા ઈલેક્ટ્રોનિક્સ સાથે ટેસ્લાનો સોદો સાચો સાબિત થાય છે, તો ટાટા ગ્રુપના આ નવા બિઝનેસ માટે તે એક મોટું પ્રોત્સાહન હશે. ટેસ્લાની ગણતરી નવા યુગની ટેક કંપનીઓમાં મોખરે થાય છે. વેચાણની દ્રષ્ટિએ તાજેતરમાં ચીનની EV કંપની BYD સામે હારી ન જાય ત્યાં સુધી ટેસ્લા વર્ષોથી વિશ્વની સૌથી મોટી EV કંપની હતી. આવી સ્થિતિમાં, ટેસ્લા દ્વારા દર્શાવવામાં આવેલ વિશ્વાસ ટાટા ઈલેક્ટ્રોનિક્સના વૈશ્વિક દરજ્જામાં વધારો કરશે.ઈન્ડિયન ઈલેક્ટ્રોનિક્સ એન્ડ સેમિકન્ડક્ટર એસોસિએશનના પ્રમુખ અશોક ચાંડકે કહ્યું છે કે, ટેસ્લાનો આ નિર્ણય ઈલેક્ટ્રોનિક્સના સ્થાનિક સપ્લાયર્સ માટે ઈકોસિસ્ટમ બનાવશે. તાજેતરમાં ટાટા ઇલેક્ટ્રોનિક્સે 50-60 ટોચના સ્તરના નિષ્ણાતોની ભરતી કરી છે. બીજી તરફ ટેસ્લા વિશે એવું કહેવામાં આવી રહ્યું છે કે, આ કંપની ભારતમાં 2 થી 3 અબજ ડોલરનું રોકાણ કરી શકે છે. નોંધનીય છે કે નીતિમાં ફેરફાર સાથે ઓટો કંપનીઓને 15 ટકા ઓછી આયાત ડ્યુટી પર $35,000 કે તેથી વધુ કિંમતની EVs આયાત કરવાની મંજૂરી આપવામાં આવી છે પરંતુ આનાથી ભારતમાં મેન્યુફેક્ચરિંગ પ્લાન્ટ સ્થાપવા માટે ત્રણ વર્ષમાં $500 મિલિયનનું રોકાણ કરવું પડશે. રોકાણ કરવા માટે વાહન ઉત્પાદકોની પ્રતિબદ્ધતા પર નિર્ભર રહેશે.