કોચ બનતાં જ ગૌતમ ગંભીરને ઝટકો! એક પછી એક બે માગણીઓ BCCIએ ફગાવી દીધી...  

બીસીસીઆઈ દ્વારા ગૌતમ ગંભીરને ભારતના નવા મુખ્ય કોચ તરીકે નિયુક્ત કર્યા બાદ હવે તમામ ધ્યાન સપોર્ટ સ્ટાફ પર છે. સૌથી મોટો સવાલ એ છે કે આગામી 5 વર્ષ સુધી ગંભીરની સાથે સાથે બેટિંગ, ફિલ્ડિંગ અને બોલિંગ કોચ કોણ હશે. ઉલ્લેખનીય છે કે રાહુલ દ્રવિડની સાથે ભારતીય બેટિંગ કોચ વિક્રમ રાઠોડ, બોલિંગ કોચ પારસ મ્હામ્બરે અને ફિલ્ડિંગ કોચ ટી દિલીપનો કાર્યકાળ પણ T20 વર્લ્ડ કપ સાથે સમાપ્ત થઈ ગયો હતો. આવી સ્થિતિમાં ટીમ ઈન્ડિયા નવા સપોર્ટ સ્ટાફની શોધમાં છે.

• પહેલા કઈ માગ ફગાવી હતી? 

સામાન્ય રીતે BCCI મુખ્ય કોચને પોતાનો સપોર્ટ સ્ટાફ પસંદ કરવાની સ્વતંત્રતા આપે છે અને ગંભીર માટે પણ કોઈ અલગ નિયમ નહીં હોય. પરંતુ બોલિંગ કોચ અને ફિલ્ડિંગ કોચ તરીકે પૂર્વ ભારતીય ઓપનરની પ્રથમ પસંદગીને બોર્ડે ફગાવી દીધી છે. ગંભીરે પૂર્વ ભારતીય ઝડપી બોલર આર વિનય કુમારને બોલિંગ કોચ તરીકે નિયુક્ત કરવામાં રસ દાખવ્યો હતો, પરંતુ બોર્ડને આ ભલામણમાં રસ ન પડ્યો. 

• હવે કઈ માગ ફગાવી? 

અહેવાલ અનુસાર, હવે બોર્ડે ફિલ્ડિંગ કોચ તરીકે જોન્ટી રોડ્સની પસંદગીને પણ નકારી કાઢી છે. રોડ્સને દુનિયામાં મોટાભાગના ક્રિકેટ પ્રેમીઓ ઓળખે છે. તેની ગણતરી આજે પણ વિશ્વના શ્રેષ્ઠ ફિલ્ડરોમાં થાય છે. આ સિવાય દક્ષિણ આફ્રિકાના દિગ્ગજ આઈપીએલમાં વિવિધ ટીમો સાથે સંકળાયેલા છે. તેણે લખનઉ સુપર જાયન્ટ્સમાં ગંભીર સાથે કામ કર્યું છે. પરંતુ બીસીસીઆઈ સપોર્ટ સ્ટાફમાં કોઈ વિદેશીની નિમણૂક કરવા ઉત્સુક નથી. છેલ્લા સાત વર્ષથી ભારત સંપૂર્ણ રીતે સ્વદેશી સહાયક સ્ટાફ સાથે કામ કરી રહ્યું છે અને બોર્ડ તેમાં કોઈ ફેરફાર કરવા માંગતું નથી.